السبت 2019/12/14   توقيـت بغداد
قناة نهرين الرياضية
Nahrain Network for Radio & TV
الأخبار
ابيات من شعر التجليبة
ابيات من شعر التجليبة
مقالات
أضيف بواسـطة nahrains
الكاتب ميسون منعيم الرومي
النـص :

ابيات من شعر التجليبة

چلبو بالحكم واشلون تچليبه

 

اجلبنك يليلي والغربه هالطولت

تفركنه غصب والعائلة اتطشرت

ابكلهه الدول واگبورنه انثرت

نخنگ بالدمع والگلب بي خيبه

اجلبنك يليلي الف تجليبه

***

اجلبنك يليلي والظلم طول

احسب بالسنين اوارجع امن اول

يمتة الفرج يا دنيه لتحول

تـِعـَلـَمـْـنه عَ الظلم يا عيبة العيبه

اجلبنك يليلي الف تجليبه

***

اجلبنك يليلي اشلون قسمه

باگوه الوطن وابغير رحمه

نوبه افندي اونوبه ابوعـِـمـَّـه

يمته تنگضي جتكم امصيبه

اجلبنك يليلي الف تجليبه

***

اجلبنك يليلي والوطن مبيوع

واطفاله اليتامه هالكتلهه الجوع

هالنشفت العين اوماضلت ادموع

چلبو بالحكم واشلون تچليبه

اجلبنك يليلي ألف تجليبه

***

اجلبنك يليي والقسمه گشره

رگبة هالشعب بيدين هالزمره

ثروات الوطن للجار يا حسره

شرمتهه الحكومه والقايد الهيبه

اجلبنك يليلي ألف تجليبه

***

اجلبنك يليلي والحرب جتنه

ولدچ يملحه كل وكت ممتحنه

دمهم للرچاب شلون هالمحنه

سكوتك يا شعب طرگاعة وامصيبه

اجلبنك يليلي ألف تجليبه

***

اجلبنك يليلي والفساد اشكال

لا ينحزر لا يخطر اعله البال

احزاب السياسه مغتصبه كل المال

چبيره امصيبتك .. ماضن الك طيبه

اجلبنك يليلي ألف تجليبه

المشـاهدات 542   تاريخ الإضافـة 03/06/2019   رقم المحتوى 24637
أضف تقييـم